Жақсы ауданының әкімдігі ауыл тұрғындарына сапалы медициналық көмектің қолжетімділігін арттыру мақсатында денсаулық сақтау жүйесін жаңғырту жұмыстарын жалғастыруда. Ауылдық жерлерде жаңа медициналық нысандардың ашылуы мен кадрлық құрамды нығайту жөнінде Өңірлік коммуникациялар қызметінде өткен брифингте аудан әкімі Алмагүл Қадыралина мәлімдеді.
Алғашқы медициналық-санитарлық көмекті дамыту аясында аудан ауылдарында дәрігерлік амбулатория мен фельдшерлік-акушерлік пункттің құрылысы аяқталды. Сонымен қатар, Жақсы аудандық орталық ауруханасында ауқымды күрделі жөндеу жұмыстары жүргізілуде. Оның ішінде ас блогы да жаңартылып, медициналық мекеме заманауи санитарлық талаптарға толық сәйкестендірілуде.
Халыққа медициналық көмектің қолжетімділігі – біздің басты басымдықтарымыздың бірі. Біз тек жаңа ғимараттар салып, қолданыстағы нысандарды жөндеумен ғана шектелмейміз. Сонымен қатар ауылдық жерлерге білікті мамандарды тарту бағытында жүйелі жұмыс жүргізіп, олардың тиімді еңбек етуіне қажетті жағдайлардың барлығын жасаудамыз
– деді Алмагүл Қадыралина.
Жүргізіліп жатқан кешенді жұмыстардың нәтижесінде ауданның медициналық мекемелеріне білікті бейінді мамандар тартылды. Денсаулық сақтау саласын инфрақұрылымдық жаңғырту мен кадрлық әлеуетті күшейтуді қатар қамтитын жүйелі тәсіл ауданның негізгі демографиялық көрсеткіштерін жақсартуға және тұрғындарға көрсетілетін медициналық қызмет сапасын арттыруға мүмкіндік беруде.