Тұтынушының құқықтарын қорғау нәтижесінде 6 286 000 теңгеден астам қаражат қайтарылды

Тұтынушылардың құқықтарын қорғау және азаматтарға даулы мәселелерді шешуде практикалық көмек көрсету — Қазақстан Республикасы Сауда және интеграция министрлігінің Ақмола облысы бойынша Сауда және тұтынушылардың құқықтарын қорғау департаменті жұмысының маңызды бағыттарының бірі.
2026 жылғы 17 қыркүйекте Департаментке жеке қабылдау барысында азамат жөндеу жұмыстарын жүргізу үшін берілген 6 286 000 теңге көлеміндегі ақшалай қаражатты қайтару мәселесі бойынша жүгінді.
Өтінішті қарау барысында азамат пен ұйым арасында бір бөлмелі пәтерде жөндеу жұмыстарын жүргізу туралы ауызша келісім жасалғаны анықталды. Алайда екі ай уақыт өткеніне қарамастан, жөндеу жұмыстары іс жүзінде орындалмаған. Осыған байланысты азамат бұрын берілген ақшалай қаражатты қайтару қажеттілігі туындаған.
Департамент мамандары тұтынушыға оның құқықтарын және туындаған жағдайды реттеудің ықтимал тәртібін түсіндірді. Практикалық көмек көрсету шеңберінде азаматқа ұйымның атына сотқа дейінгі талап-арызды дайындау және жолдау бойынша жәрдем көрсетілді.
Дауды сотқа дейінгі тәртіппен реттеу нәтижесінде тараптар арасында туындаған мәселе сотқа жүгінбей шешімін тапты.
Жүргізілген жұмыстың қорытындысы бойынша 6 286 000 теңге көлеміндегі ақшалай қаражат азаматқа толық көлемде қайтарылды.
Осылайша, азаматтың Департаментке уақытылы жүгінуі және тұтынушының құқықтарын қорғау бойынша қабылданған шаралардың нәтижесінде даулы жағдай сотқа дейінгі тәртіппен реттелді.
Департаментте азаматтардың тауарларды сатып алуға, жұмыстарды орындауға немесе қызметтерді көрсетуге байланысты құжаттар мен өзге де дәлелдемелерді сақтауы маңызды екені атап өтіледі. Олардың қатарында шарттар, қолхаттар, төлем құжаттары, сондай-ақ орындаушымен жүргізілген хат-хабарлар болуы мүмкін. Мұндай материалдардың болуы даулы жағдайлар туындаған кезде маңызды мәнге ие.
Тұтынушылық құқықтар бұзылған жағдайда азаматтар өз құқықтарын қорғау тәртібі бойынша консультация және түсіндіру алу үшін Департаментке жүгіне алады. Департамент мамандары азаматтардың өтініштерін қарайды және өз құзыреті шегінде қажетті практикалық әрі консультациялық көмек көрсетеді.
Бұл бағыттағы жұмыс халықтың құқықтық сауаттылығын арттыруға, тұтынушылардың құқықтарын қорғау саласындағы заңнама талаптарының бұзылуының алдын алуға, сондай-ақ азаматтардың өздерінің заңды құқықтары мен мүдделерін тиімді қорғау мүмкіндігін қамтамасыз етуге бағытталған.