Қазақстан цифрлық теңге жобасын – елдің қазіргі қаржы жүйесінің бір бөлігіне айналатын ұлттық валютаның жаңа нысанын белсенді дамытуда.
Цифрлық теңге Қазақстанда қолма-қол және қолма-қолсыз қаражатпен қатар ақшаның үшінші түрі болады. Ол үйреншікті төлем тәсілдерін алмастырмайды, керісінше, оларды толықтырып, қаржылық операцияларды одан әрі ыңғайлы және жылдам етеді.
Ұлттық цифрлық валютаның басты артықшылықтарының бірі есеп айырысу жылдамдығы болмақ. Төлемдер мен аударымдар іс жүзінде бірден өтеді, бұл цифрлық экономиканың жылдам дамуы жағдайында ерекше маңызды.
Цифрлық теңге физикалық нысанда болмайды, алайда оған теңге символы (₸) негізінде ақ-жасыл түстермен орындалған арнайы логотип әзірленген.
Қазақстанның Ұлттық Банкі жаңа цифрлық валютаның эмитенті болады. Бұл цифрлық теңгенің мемлекеттік кепілдіктермен қамтамасыз етілгенін және ресми төлем құралына айналатынын білдіреді.
Цифрлық теңге қолма-қол және қолма-қолсыз ақшаның артықшылықтарын біріктіреді. Мысалы, жекелеген операцияларды интернетке қосылмай-ақ жүргізуге болады. Оның көмегімен онлайн сатып алуларды және POS-терминалдар арқылы төлемдерді, сондай-ақ жылдам аударымдарды жасауға болады.
Сонымен қатар, қажет болған жағдайда цифрлық ақшаны қолма-қол ақшаға айырбастауға немесе банктік депозитке аударуға болады. Бұл ретте ұлттық валютаның барлық түрлері тең құнды болады: 1 цифрлық теңге қолма-қол немесе қолма-қол емес 1 теңгеге тең болады.
Валютаның жаңа түрі азаматтарға, бизнеске және мемлекеттік ұйымдарға төлемдер мен есеп айырысуларды жүзеге асыру кезінде қолжетімді болады. Алайда цифрлық теңгедегі шоттарға пайыздар есептелмейді.
Цифрлық теңгенің ерекшелігі оның бағдарламалануы болып табыладыБұл қаражатты пайдаланудың белгілі бір мақсаттарын, мысалы, әлеуметтік төлемдер немесе мемлекеттік сатып алулар үшін, белгілеуге мүмкіндік береді. Мұндай механизм қаржылық операциялардың ашықтығын арттырып, қаражатты мақсатты пайдалануды бақылауды күшейтуге көмектеседі.
Ұлттық Банк оны шығару және айналысқа шығару қағидаларын бекітті және қаржы нарығының қатысушыларымен бірлесе отырып, платформаны дамытуды жалғастыруда.